Dio makedonske delegacije napustio je salu u kojoj se održava Generalna skupština UN u NJujorku tokom govora predsjednika Makedonije Đorđa Ivanova, koji je kritikovao visoke zvaničnike SAD i EU zbog podrške predstojećem referendumu i pozvao sunarodnike da ne izađu na glasanje u nedjelju.
Ivanov je, govoreći pred delegatima u UN, ocijenio da je izmjena naziva Makedonija "zamka" i "grubo kršenje suvereniteta".
Makedonski predsjednik je kritikovao američke i evropske zvaničnike koji su posjetili Makedoniju proteklih nedjelja, jer su, kako je naveo, nagovijestili da izmjena imena pruža njegovoj zemlji jedinu nadu da se ikada pridruži NATO-u i EU, prenose mediji.
"Ako nam oduzmete nadu, šta će nam onda ostati?", upitao je Ivanov.
Zamjenik ministra spoljnih poslova Makedonije Andrej Žernovski napisao je na "Fejsbuku" da su salu napustili jer nisu željeli da daju "legitimitet skandaloznom nastupu Ivanova, ispunjenom manipulacijama, mržnjom".
"Otvoren poziv za bojkot referenduma i gruba zloupotreba govornice je istinski poziv na samoizolaciju, ali i krajnja neodgovornost prema sadašnjim i budućim generacijama. Ispraćajući u istoriju i njega i njegove stavove, nastavljamo da sa prijateljima iz EU, NATO-a i građanima da gradimo zajedničku prosperitetnu budućnost", napisao je Žernovski.
Referendum koji će biti održan u Makedoniji u nedjelju, 30. septembra, odnosi se na težnje Skoplja ka članstvu u EU i NATO, kao i na sporazum sa Atinom o nazivu te bivše jugoslovenske republike.
Referendumsko pitanje će glasiti: "Da li ste za članstvo u EU i NATO, uz prihvatanje sporazuma o nazivu između Makedonije i Grčke?".
Skoplje i Atina potpisali su 17. juna sporazum kojim je okončan višegodišnji spor zbog naziva Makedonije.
