Vestu se na teret stavlja opiranje pri hapšenju, opijanje na javnom mjestu i remećenje javnog reda i mira.

Bivši as je pijan vikao na ulici i udarao po vratima jedne kuće. Policija je došla da interveniše što je razbijesnelo Vesta. Sa vodkom i pivom u rukama je nerazumno govorio i opirao se pri hapšenju.

Iako je u karijeri zaradio više od 16 miliona dolara, američki košarkaš je ostao bez prebijene pare.

Bivši saigrač Lebrona Džejmsa imao je velikih mentalnih problema tokom karijere, dijagnostifikovan mu je bipolarni poremećaj, kasnije se odao porocima i život mu se potpuno raspao.

Vest je imao uspješnu NBA karijeru. Na draftu 2004. godine izabran je kao 24. pik od strane Bostona. Igrao je kasnije za Sjetl, Dalas i Klivlend, gdje su mu saigrači bili Lebron Džejms i Saša Pavlović. Karijeru u najjačoj ligi svijeta završio je 2012. godine. Kasnije je igrao u Kini i 2015. je definitivno završio karijeru.

Samo godinu dana kasnije na društvenim mrežama su se pojavile fotografije Vesta na ulici u užasnom stanju. Postao je beskućnik i zavisnik od alkohola i teških droga.

Prošle godine je vlasnik Dalasa Mark Kuban pronašao bivšeg košarkaša u užasnom stanju na jednoj benzinskoj pumpi u Dalasu. Platio mu je odvikavanje od droge i pronašao smještaj te ga finansirao. Delonte se oporavio i počeo da radi, svi su mislili da je ružnu prošlost ostavio iza sebe, da mu je krenulo u životu, međutim, ubrzo se vratio porocima i ponovo upao u ozbiljne probleme.