Reprezentacija Srbije savladala je Austriju sa 3:2. Dušan Tadić, koji je upisao dvije asistencije i postigao jedan gol, doživio ovacije na stadionu “Rajko Mitić”. Blistao i Aleksandar Mitrović, koji je postigao dva gola.

Fudbalska reprezentacija Srbije pobijedila je u Beogradu Austriju sa 3:2 u trećem kolu kvalifikacija za Svjetsko prvenstvo i tako izbila na prvo mjesto Grupe D.

Junak pobjede Srbije ponovo je bio Dušan Tadić koji je večeras, kao i u utakmici protiv Moldavije u četvrtak, zabilježio dvije asistencije i gol. Dvostruki strelac bio je Aleksandar Mitrović.

Austrija je dva puta izjednačavala, a strelci za nju su bili Marcel Zabicer i Marko Janko.
Srbiji je ovo bila druga uzastopna pobjeda i sada ima sedam bodova, koliko ima i Irska, koja je u gostima pobijedila Moldaviju 3:1, ali uz slabiju gol razliku.

Vels je ranije danas odigrao kod kuće 1:1 sa Gruzijom i sada je treći sa pet bodova. Austrija ima četiri boda, Gruzija jedan, a Moldavija nijedan.

Srbija je vezala drugu pobjedu predvođena ponovo odličnim Tadićem, koji je potvrdio dobru igru iz Moldavije i sa dvije asistencije protiv Austrije pokazao da je najraspoloženiji igrač ekipe selektora Slavoljuba Muslina.