Belgijanac Anđelo Valkenborg je, kako se smatra u savremenom društvu sve - suprugu, posao šefa i hipotekarni kredit, ali je sve to napustio da bi se vratio u praistoriju.

Već tri mjeseca, ovaj 30-godišnjak iz Limburga živi kao pravi lovac-sakupljač u jednoj šumi na jugu Slovenije.

Hrani se isključivo od plodova koje pronalazi u prirodi, a jedini savremeni predmet koji je zadržao je mobilni telefon koji puni solarnom energijom.

Anđelo je dugo godina bio fasciniran opstankom u prirodi i pročitao na desetine knjiga i priručnika o preživljavanju. Nakon nekoliko kraćih treninga u Švedskoj i Njemačkoj, odlučio je da živi kao pećinski čovjek. Od granja i lišća sagradio je sebi zaklon: "Moj cilj je bio da napravim kolibu u kojoj mogu da palim vatru. Srećom pa je ovdje glineno tlo".

Hrani se ribizlama, žabama, koprivama, ali mu nije dozvoljeno da lovi.

"Nakon četiri godine proučavanja tehnika preživljavanja i dalje pravim greške. Nije nimalo jednostavno, ali sam jako srećan", objašnjava ovaj moderni kromanjonac, prenose belgijski mediji.

Budući da još nije savladao rukovanje lukom i strijelom, meso kupuje u obližnjem selu.

"Volio bih da mogu da lovim jelene i divlje svinje, ali za to još nisam sposoban, a i zabranjeno je. To bi se smatralo lovokrađom", kazao je Anđelo koji sanja o životu primitivnog čovjeka u Kanadi, na Aljasci ili u Sibiru.

Iako je njegov cilj da živi u potpunoj izolaciji od svijeta, priznaje da nije sasvim odsječen od civilizacije.

"Moj automobil je parkiran na izlazu iz šume, za svaki slučaj. Plan je da ga se zauvijek riješim. Posljednjih 200 godina, tehnike preživljavanja koje su razvili naši preci potpuno su zaboravljene. Zahvaljujući internetu pokušavamo da spasimo to znanje", rekao je on.